इलाम:इलाम नगरपालिकाले कार्यालयभित्र फेसबुक र युट्युब चलाउन रोक लगाएको छ । वाइफाई बन्द गरेको नगरपालिकाले कार्यालयमा रहेको कम्प्युटर र ल्यापटपमा समेत फेसबुक र युट्युब नचल्ने बनाएको हो । नगरपालिका क्षेत्रको सवै वडामा इन्टरनेट नेटवर्क विस्तार गरेको छ । सवै वडामा सिसिटिभी क्यामेरा, भिओई जडान गरिएको छ ।
अब नगरपालिकाको सवै वडाको अनुगमन नगरपालिका कार्यालयबाटै हुनेछ । नगर प्रमुख र प्रमुख प्रशासकीय अधिकृतले कार्यालयबाटै नगरभित्र भइरहेको गतिविधिको अनुगमन गर्नेछन् । कार्यालय बाहिर रहेका बेला नगरप्रमुखले भने मोवाइलबाटै वडा र कार्यालयको गतिविधि नियाल्न सक्ने नगरपालिकाका आइटी इञ्जिनियर सञ्जय घिमिरेले बताउनुभयो ।
सञ्जाल विस्तारपछि सफ्टवेयर मार्फत बिल काटिने, खानेपानी, राजश्वको विल भुक्तानी पनि वडाबाटै गर्न सम्भव हुन्छ । तर, यो सेवा भने वडा कार्यालयमा विस्तार भइसकेको छैन । वडा कार्यालयमा विद्युतीय हाजिरी राखिएको छ । त्यसको रेकर्ड समेत नगरपालिका कार्यालयबाट हेर्न सकिन्छ । वडामा भएका गतिविधि कार्यालय समय अघिपछि समेत हेर्न सकिने बनाइएको छ ।
नगरपालिका कार्यालयमा वाइफाई बन्द गरिएकोे छ । नगर क्षेत्रका माध्यमिक तहका विद्यालय र स्वास्थ्य संस्थामा समेत नेटवर्क विस्तार गरिने नगरप्रमुख महेश बस्नेतले बताउनुभयो ।